डायस्पोरा मध्ये बेलायतमा नेपालीको जनसंख्या बृद्धिसँगै नेपाली मिडियाको खाँचो बढन थालेको छ। त्यो खाँचो पुरा गर्न बिभिन्न व्यक्तिहरु मिडिया मार्फत प्रयास गरिरहेका छन । तरपनि त्यो पुरा हुन सकिरहेको छैन कि भन्ने हाम्रो बुझाई छ ।

बेलायतबासी र प्रवासमा रहेका नेपालीको दुःख–सुख, आँशु–हाँसोलाई समेट्न सक्ने नेपाली मिडियाको खाँचोलाई हामीले पुरा गर्ने प्रतिबद्धताका साथ अघि बढने निर्णय गरेका छौ । डायस्पोराका नेपाली समाजको जिम्मेवारीलाई आफ्नै जिम्मेवारी ठान्दै पत्रकारिता क्षेत्रमा व्यवसायी ढंगले हामी दह्रो पाइला टेक्न खोजेका छौ । आशा छ यो अभियानमा तपाईहरुको सहयोग साथ हामीले पाउने छौ । विशेष गरि बेलायतस्थित नेपाली समाजभित्रका प्रगति, उन्नतिका कुरालाई विश्वभर फैलाउने र विकृत तथा विसंगतिको खवरदारी गर्ने हाम्रो लक्ष्य छ । त्यस्तै, डायस्पोरामा हुने गलत कार्यलाई सच्याउन संभव भए सम्म समाजमा सचेतना फैल्याउने प्रयास गर्नेछौ । यसैका लागि व्यवसायिक संचारकर्मीको समूह मिलेर एउटा मिडियो खोल्नु पर्ने खाँचो हामीले महसुस गरेका छौ । त्यसका लागि हामीले आजदेखि एउटा अनलाईन पोर्टल सुरु गरेका छौं - ब्रिटिशखवर डटकम । यस ब्रिटिशखबरमा बेलायत र नेपालका साथै अमेरिकामा समेत रहेका पत्रकारितामा अनुभवी र उत्साही टीम आवद्ध रहेको जानकारी गराउँछौ ।

पत्रकारिता समाजको ऐना हो भन्ने विश्वव्यापी मान्यता अनुशरण गरेर समाजका घट्ना सकेसम्म चांडो र जस्ताको तस्तै प्रस्तुत गर्ने हाम्रो उदेस्य छ । ‘पत्रकारिता हतारको साहित्य हो’ भन्ने उक्तिबाट हामी अनभिज्ञ छैनौं तर हतारको साहित्यका नाममा काल्पनिक वा तथ्यहीन समाचार छिटो छिटो ‘ब्रेक’ गरेर पहिलो हुनु हाम्रो प्राथमिकता रहने छैन् । ब्रिटिशखबर डटकमले विश्वभरका नेपालीहरुको उन्नती , प्रगती र सफलताका समाचारहरु पाठकहरु समक्ष पस्कन सक्ने हाम्रो विश्वास छ ।

देश बाहिर प्रवासमा पनि नेपाली कला, संस्कृति, धर्म, साहित्य, भाषा, भेषभूषा, परम्परा संरक्षण संवर्धन गर्ने समाचार सामाग्रीमार्फत आफ्नो दायित्व निर्वाह गर्न सधैं लागि परिरहने छौं। हामीले बेलायत र विश्वभरका गतिविधि, समाचार, मल्टीमिडिया र समसामयिक विषयवस्तु नेपाली एवं अंग्रेजी भाषामा प्रस्तुत गर्नेछौं । बेलायतमा जन्मे हुर्किरहेको दोश्रो नेपाली पुस्ता लक्षित अंग्रेजी भाषाका सामाग्रीले उनीहरुलाई मातृभूमिसंग जोडिराख्छ भन्ने अपेक्षा छ । बेलायतस्थित नेपाली समुदाय र विश्वभरका समसामयिक विषयवस्तु, कला, साहित्य, खेल, सफलताका कथा, एनआरएन र अन्य सामाजिक र सामुदायिक गतिविधि हामीले प्राथमिकतासहित समेटिने छ । यसका लागि समस्त पाठक, दर्शक र शुभेच्छुक महानुभाबहरुको रचनात्मक सल्लाह , सुझाव , साथ् र सहयोगको समेत अपेक्षा गरेका छौं।

- ब्रिटिशखबरडटकम (britishkhabar@gmail.com)